چاٹی کی لسّی

چاٹی کی لسّی

 لسّی۔۔۔۔۔۔۔۔!

وہ بھی چاٹی والی لسّی۔۔۔۔۔۔۔۔!

پنجاب کے زرخیز کلچر کے قوس و قزح کے بکھرے رنگوں کا سنہری نرم روپیلی گداز دھوپ کی کرنوں کی مانند خوبصورت صبیح صبح کے اجلے رنگ کا پرتو لیے۔۔۔۔۔۔۔۔!

جب بانکی سجئیلی الہڑ مٹیار۔۔۔۔۔۔۔۔!

جو ککڑ کی بانگ سے بھی پہلے الوداعی تاروں کی نرم ٹمٹماتی چھاؤں میں نیم خوابیدگی کی سی کیفیت میں اپنی جھیل سی گہری نین کٹورا شفاف قرمزی آنکھوں میں بکھری شفق، بکھرے کاجل میں جلتے دیے کی لو لیے شہتوت کی ٹہنیوں کی مانند لچکیلی بانہوں کو اٹھا کر قیامت خیز انگڑائی لے کر اٹھتی ہے۔۔۔۔۔۔۔۔!

 

صبیح چہرے پر میدے و سندور سے گندھے ہوئے حنائی ہاتھوں سے پانی کے چھینٹے پڑنے سے تازگی مزید نکھرتی ہے۔۔۔۔۔۔۔۔! 

شفاف موتی اس مہر جبین کی طاق جبین، ستواں ناک، ناک میں پڑی نتھلی، میدے و سندور میں گندھے شفق کی سرخی لیے گالوں، ان میں پڑنے والے ڈمپل، چاہِ زنخ، بن گوش میں بُندوں، سیاہ امبر ریشمی زلفوں میں بکھرے ہوتے ہیں۔۔۔۔۔۔۔۔!

یونانی دیوئیوں کا سا ملکوتی حُسن لیے وہ یونانی اپسرا مہر جبین کل دن بھر کے اُپلوں و چٹختی لکڑیوں کے سرخ و نیلگوں شعلوں کی دھیمی آنچ پر کڑھتے ہوئے روپیلی سنہری بالائی کی مُدھر دبیز مخملی پرتوں چڑھی دودھ کی چاٹی جس کو پھر رات بھر کے لئے جاگ لگائے رکھا تھا۔

اس دودھ کی چاٹی کو گردی پر رکھ کر پیڑھی پر براجمان ہوتی ہے۔۔۔۔۔۔۔۔!

مدھانی کے جُٹ کو چاٹی میں ڈال کر چپن کو اس پر جماتی ہے۔۔۔۔۔۔۔۔!

چوکھٹے کے ساتھ جمے آئینہ سے اپنے صبیح حُسن کا تنقیدی جائزہ لیتی ہے۔۔۔۔۔۔۔۔!

اور کسی کی یاد سے آنکھوں میں جلتے دئیوں کی لو مزید بڑھک اٹھتی ہے۔۔۔۔۔۔۔۔!

تمازت سے شہابی گالوں میں قوس و قزح کے بکھرتے رنگوں کے ساتھ ڈمپل و چاہ زنخ کے گڑھوں میں مزید گہرائی اتر آتی ہے۔۔۔۔۔۔۔۔!

لہراتی و بل کھاتی ریشمی زلفوں کو عشوہ ناز و ادا سے جھٹک دیتی ہے۔۔۔۔۔۔۔۔!

چاٹی کی گردن میں ڈالنے والے موتیوں، سیپیوؤں، گھنگھرؤں سے مزین ویترے (رسی) کے کس بل سیدھے کرتی ہے۔۔۔۔۔۔۔۔!

کبھی دھیان و توجہ کسی اور طرف ہونے کی بدولت گرہیں سلجھنے کے بجائے مزید الجھ جاتی ہیں۔۔۔۔۔۔۔۔!

جس سے جبینِ ناز پر سلوٹیں مزید گہری ہو جاتی ہیں۔۔۔۔۔۔۔۔!

یونانی دیوئیوں کا سا ملکوتی حُسن لیے پری تمثال یونانی اپسرا سا شاہکار بنی وہ ماہ پارہ میدے و سیندور میں گندھے اپنے بلور ہاتھوں سے جب ویترے کو مدھانی کے گرد بل دے کر ویترے کے ساتھ بندھے ہوئے روگ (لکڑی کی کلیوں) کو تھام کر مدھانی کو بلوتی ہے۔۔۔۔۔۔۔۔!

‏مدھانی بلونے کے ساتھ ساتھ خود بھی ہلارے لے رہی ہوتی ہے۔۔۔۔۔۔۔۔!

صبیح صبح کی خامشی میں اس کی مضبوط شہتوت کی مانند لچکیلی بانہوں میں جب ہرے کاسنی اودھے سرخ و بنفشی زمرد سرسوں کے رنگوں کی چوڑیاں جب کھن کھن کھنکتی ہیں۔۔۔۔۔۔۔۔!

چاروں اور سُر لے تال بکھیرتی ہیں۔۔۔۔۔۔۔۔!

فضا میں جلترنگ بکھیر دیتی ہیں۔۔۔۔۔۔۔۔!

جیسے دور مندروں میں بجتی گھنٹیاں۔۔۔۔۔۔۔۔!

‏جاڑے کی کُہر و دھند میں لپٹی صُبح میں بھی اس صبیح حُسن والی الہڑ مُٹیار کی طاقِ جبین، سِتواں ناک، چاہ زنخ، شہابی گالوں پر شفاف موتی بکھر جاتے ہیں۔۔۔۔۔۔۔۔!

مدھانی کی گھر گھر گھر گھر کی مُدھرتا سُر لے تال۔۔۔۔۔۔۔۔!

کانچ کی چوڑیوں کی کھنک۔۔۔۔۔۔۔۔!

سِتواں ناک میں پڑی نتھلی کے ہلکارے۔۔۔۔۔۔۔۔!

بِن گوش میں پڑے بُندوں کے رقص کے ساتھ ساتھ سیاہ ریشمی امبر زلفوں کے ساتھ چھیڑ خانی۔۔۔۔۔۔۔۔!

صبیح چہرے کے ساتھ لہراتی بل کھاتی ریشمی امبر زُلفوں کی چھیڑ خانئیاں۔۔۔۔۔۔۔۔!

نازنین کے لسّی بلونے کے ساتھ سیاہ ناگن کی طرح ریشمی زُلفوں کو سمیٹنے کی اپنی سی ناکام کوشش سے وہ مزید اُلجھ جاتی ہیں۔۔۔۔۔۔۔۔!

جن کو بالاخر ایسے ہی چھیڑخانی و رقص کُنائی کی کیفیت میں چھوڑ دیتی یے۔۔۔۔۔۔۔۔!  

یونانی دیوی و یونانی اپسرا کے لسّی بلونے کے ساتھ ہلکارے۔۔۔۔۔۔۔۔!

بالاخر کو اس فینٹئیسی کا خُمار ٹوٹتا ہے۔۔۔۔۔۔۔۔!

اور پری تمثال یونانی دیوئی میدے و سندور میں گندھے بلور ہاتھوں سے گول مکھن کے پیٹرے نکال کے سائیڈ پر رکھتی ہے۔۔۔۔۔۔۔۔!

اور لسّی کو بڑے گڈوے میں انڈیل دیتی ہے۔۔۔۔۔۔۔۔!

اس لسّی کے ایک ایک گھونٹ میں فرحت بخش تازگی زندگی اپنی تمام تر رعنائیوں و جوبن کے ساتھ حلق سے اترتی محسوس ہوتی ہے۔۔۔۔۔۔۔۔!